«Biz azərbaycanlı həmkarım, general-polkovnik Zakir Həsənovla səmimi görüş keçirdik. Azərbaycanın Avrasiya regionunda rolu fundamental əhəmiyyət daşıyır və ölkə İtaliya üçün əsas dialoq tərəfdaşı, həmçinin enerji sektorunda strateji tərəfdaşdır».

Vesti.az-ın məlumatına görə, bu barədə İtaliyanın müdafiə naziri Qvido Krozetto «X» sosial şəbəkəsindəki səhifəsində yazıb.

Nazir İran pilotsuz uçuş aparatlarından istifadə edilməklə Azərbaycana edilən hücumu qətiyyətlə pisləyib, eyni zamanda Bakının gərginliyin idarə edilməsində nümayiş etdirdiyi təmkin və məsuliyyət hissini yüksək qiymətləndirib.

«Görüş zamanı ikitərəfli əməkdaşlığın möhkəm və artan əhəmiyyəti bir daha təsdiqlənib. Bunun xüsusilə müdafiə sahəsində, o cümlədən iki ölkənin silahlı qüvvələri arasında təlim və birgə hərbi təlimlər, habelə müdafiə-sənaye sektorunda əməkdaşlıq baxımından aktual olduğu vurğulanıb. Bundan əlavə, əməkdaşlıq istiqamətlərinin genişləndirilməsi məqsədilə əlavə müzakirələrin təşviq edilməsi barədə razılıq əldə olunub», — deyə nazir əlavə edib.