Bu barədə Report-a Azərbaycan sərbəst güləş yığmasının baş məşqçisi Xetaq Qazyumov məlumat verib.

Onun sözlərinə görə, Tiranda keçirilən Avropa çempionatında komanda hesabında qələbə bütün komandanın əlaqələndirilmiş işinin nəticəsidir.

"Biz çox xoşbəxt və qürurluyuq ki, komanda hesabında Avropa çempionu olduq. Bu, əlaqələndirilmiş komanda işinin nəticəsidir. Azərbaycan Güləş Federasiyasına, Gənclər və İdman Nazirliyinə, Milli Olimpiya Komitəsinə diqqət və dəstəyə görə təşəkkür edirəm", - deyə o qeyd edib.

O əlavə edib ki, yığma əldə edilənlə kifayətlənmək fikrində deyil və tezliklə növbəti turnirə hazırlığa başlayacaq.

"Bu nəticə ilə kifayətlənmək fikrində deyilik. Yaxın günlərdə istirahət edəcək və mövsümün ən vacib startına - dünya çempionatına ciddi hazırlığa başlayacağıq. Azarkeşləri bir daha sevindirməyə çalışacağıq", - deyə Qazyumov bildirib.